Төркиянең туризм индустриясе курорт кунакханәләрендә «все включено» системасын бетерергә әзер түгел, артык чыгымнар, аеруча Россия туристларында дискомфорт китереп чыгарырга һәм альтернатив маршрутлар эзләргә мәҗбүр итәргә мөмкин. Бу хакта РИА Новости Дзен-каналы яза.
Төркия кунакханәләрендә «все включено» системасы аркасында туристлар кунакханәләрдә чыкмый диярлек һәм гел ашап ята, бу – аларның сәламәтлегенә дә, илнең туристик потенциалын ачуга да зыянлы, дип сөйләгән булган «РИА Новости»га Төркиянең кече отельерлар ассоциациясе президенты Эртан Устаоглу. Урта диңгез буе отельерлары һәм менеджерлары ассоциациясе рәисе Каан Кавалоглу бу системадан баш тартырга һәм туристларның бары тик үзләренә кирәк булган опцияләрне сайлау вариантына күчәргә тәкъдим итте. Моңа үрнәк итеп, Кавалоглу кунакханәдә «алкогольсез» ял итүне сайлау вариантын китерде.
«Все включено» опциясе туристлар арасында, аерым алганда Россиядән килгән туристлар арасында, традицион рәвештә популяр. Туристлар Төркиядә ял итү өчен үз бюджетларын алдан ук билгеләп куярга ияләшкән. Үз-үзен дәлилләгән системаны бетерү... без әлегә моңа әзер түгел. Россия туристлары кунакханәләрдән читтә туклануга һәм күңел ачуга күбрәк акча тота башларга мөмкин, бу – аларның Төркиягә килү бюджетын үзгәртергә мөмкин. Бу – уңайлылык һәм ялдан канәгатьлек дәрәҗәсен дә киметәчәк. Яңа маршрутлар эзләү башланачак. Һәм моннан кем югалтачак?» – дигән агентлык әңгәмәдәше.
Аның сүзләренчә, хәзер курорт кунакханәләре яңа шартларга яраклашырга тырыша, хезмәт күрсәтүнең катнаш модельләрен яки махсус пакетлар тәкъдим итә.
«Матбугаттагы бу сөйләшүләргә дә карамастан, тулаем алганда, «все включено» системасын бетерү Төркиянең туризм инфраструктурасына яңа чакыру булырга мөмкин икәнен индустриядә аңлау бар, ә начар нәтиҗәләр ихтималы турында әйтеп тә торасы юк», – дип өстәгән ул.
Төркия кунакханәләрендә «все включено» системасыннан баш тарту Россия туристларының түләү карталары аркасында түләү белән проблемалар китереп чыгарга мөмкин, дип кисәткән иде Россиянең Төркиядәге илчесе Алексей Ерхов. Төркиянең «Vatan» партиясе рәисе урынбасары Хакан Топкурулу, мондый чара туристлар агымын, шул исәптән Россия туристларын, башка илләргә җибәрәчәк, дигән иде.