Күзлек – күз күрүен төзәтүче мөһим әйбер генә түгел, ә модалы аксессуар да, һәм аны даими чистартып тору таләп итә. Аларда көн саен тузан, пычрак, бармак эзләре һәм башкалар барлыкка килә.
Вакыт үтү белән, хәтта иң сыйфатлы линзалар да ачыклыгын югалта һәм тоныклана башлый. Яңа күзлек алырга ашыкмагыз, яңартуның гади һәм уңайлы ысулын кулланып карагыз, ул – гади сабын, «тоныкланып беткән күзлекләр дә чип-чиста була» дип язалар киңәшләр сайтында.
Сабын, бигрәк тә сыегы, балалар өчен яки йомшак хуҗалык сабыны (72%), оптиканы чистарту өчен иң яхшы вариант. Ул майны, тузанны һәм пычракны сак кына юып ала, линзалар өслегенә зыян китерми. Моннан тыш, сабын күзлек өстендә нечкә саклагыч катлам барлыкка китерә, ул микротырналуларны һәм вак кытыршылыкларны бераз яшерә, күзлеккә ачыклык һәм ялтыравык кайтара. Иң мөһиме – эчендә кыргыч бөртекләр, кислоталар яки агрессив кушылмалар булган сабын кулланмаска, алар линза капламына зыян китерергә мөмкин.
Эш тәртибе
- Башта күзлекне җылы агымсу астында яхшылап юып алырга кирәк, бу – зур тузан бөртекләрен бетерә һәм чистарту вакытында тырналуларны булдырмый.
- Соңыннан бармак очына яки йомшак тукымага (микрофибра) бераз сабын сылап алырга.
- Ике ягын да, шулай ук оправасын, әкрен генә түгәрәк хәрәкәтләр белән чистартырга – шул исәптән тоткычлар һәм борын терәүләре тирәсендәге кыенрак урыннарны да.
- Калган сабынны җылы су белән яхшылап юып төшерергә, сабын эзе калмавын тикшерергә.
- Күзлекне йонсыз йомшак салфетка белән яки чиста микрофибра тукыма белән сөртеп киптерергә.
- Бу гади процедура линзаларга яңадан ачыклык бирә, май һәм тузанны бетерә, ә сабыннан калган нечкә катлам ялтыравыкны арттыра.
Өстәмә киңәшләр һәм саклык чаралары
- Әгәр линзалар бик нык тырналган булса, сабын белән чистартканнан соң 1 тамчы глицерин сөртеп, микрофибра белән әкрен генә ышкып алырга мөмкин. Бу – өслекне яхшырак сакларга һәм кимчелекләрне киметергә ярдәм итә.
- Абразив чаралар, порошоклар, каты губка һәм тукымалар кулланмаска.
- Линзаларны коры тукыма белән сөртмәскә.
- Спирт яки кислота булган агрессив химия чараларын кулланмаска, ләкин җитештерүче тәкъдим иткән махсус чараларны кулланырга була.
