Төмән юлында авариядә эшмәкәр Азат, хатыны Чулпан, өч баласы үлгән, ике баласы авыр хәлдә

14 августта Төмән – Ханты-Мансийск федераль трассасында «Инфинити» машинасы идарәсен югалта һәм каршы як полосага чыгып, прицеплы «Вольво» йөк машинасына бәрелә. «Инфинити» Тубыл шәһәре ягына таба бара. Әлеге фаҗига турында «Комсомольская правда» яза.

Машина салонында күп балалы гаилә була. Алар – 38 һәм 32 яшьлек ир белән хатын, аларның 5 баласы. Йөртүче Азат Н., хатыны Чулпан алгы утыргычта була, алар авария урынында үлә. Ике кыз балалары да шунда ук һәлак була. Өченче бала хастаханәгә юлда, «ашыгыч ярдәм» машинасында үлә. 3 һәм 11 яшьлек малайларының гомерен саклап калу өчен табиблар көрәшә. Балалар бик авыр хәлдә, реанимациядә ята.

Азат Тубылда яши, якындагы гына әти-әнисе дә тора, мәчеткә йөри, дини кеше була. Дуслары аны, гел мәрхәмәтле булды, дип искә ала, эшен яхшы башкара, хатынын һәм балаларын ярата.

Хәзер Азатның сыйныфташлары аның ятим калган балаларына ярдәм җыя.

«Мәрхүм Азат Зиннурович безнең сыйныфташ иде. Гел ярдәм итте. Безнең 15нче мәктәптә укытучылар, сыйныфташлар Азатның гаиләсенә матди ярдәм җыя. Азат яхшы кеше, намуслы эшмәкәр иде. Күпләргә йорт салып бирде, безгә дә», – ди сыйныфташы Лилия Бәхтиева.

Азат бизнес белән шөгыльләнә, аз катлы йортлар сала. Азатның хатыны Чулпан эшләми. Азат яшь чагында спорт белән шөгыльләнгән, яхшы укыган, дусларына, хезмәттәшләренә ярдәм иткән.

«Азат якын дустым иде. Мин авария урынына бардым. Бүген җирләү эшләре белән йөрибез. Урыны җәннәттә булсын», – дигән мулла Фәннүр Казымов.

Әлегә җирләү вакыты билгеле түгел.

ЮХИДИ рәсми белешмәсе буенча, «Инфинити G35» йөртүчесе яннан бара торган транспортны узганда идарәсен югалта, каршы як полосага чыга һәм «Вольво» белән бәрелешә. «Авариядә 5 кеше – 32 яшьлек йөртүче, аның 38 яшьлек хатыны, 7, 9 һәм 14 яшьлек өч кызы һәлак булды, 3 һәм 11 яшьлек ике улы хастаханәдә», – диелә ЮХИДИ хәбәрендә.

Азатның дуслары исә, йөк машинасы кисәк борылган, йөртүче тормозларга өлгермәгән, шуңа күрә аның гаебе юк, дип фаразлый, диелә «КП» хәбәрендә.