Тольяттида «Сөембикә» татар теле һәм мәдәнияте клубында «Шүрәле» әсәре белән таныштылар

Тольятти шәһәренең «Сөембикә» татар теле һәм мәдәнияте клубында чираттагы очрашу узды. Чара «Уңышка илтүче тел» программасы кысаларында оештырылды. Бу турыда «Самар татарлары» сайтында хәбәр итәләр.

Очрашу барышында клубның алдагы уку елына эш планы белән таныштылар. Катнашучылар шулай ук үткән темаларны кабатлады һәм вариантлар буенча мөстәкыйль эш башкарды. Очрашуда бөек татар шагыйре Габдулла Тукай иҗатына да игътибар бирелде.

Катнашучылар шагыйрьнең танылган «Шүрәле» әсәре белән танышты. Очрашуда шулай ук татар халык әкиятләре мотивлары буенча Мариин театрында «Шүрәле» балеты куелуы турында сөйләштеләр.

Киләсе очрашуларда да татар телен һәм мәдәниятен өйрәнүне дәвам итү планлаштырыла, диелә хәбәрдә.