«ТНВ» каналында режиссер булып эшләгән Илсур Садыйков вафат
Телеканал мәрхүмнең якыннарының кайгысын уртаклашты.
«ТНВ» каналы режиссер Илсур Садыйков 56 яшендә вафат булуын хәбәр итте. Бу турыда каналның социаль челтәрләрдәге сәхифәсендә язылган.
«ТНВ» каналында режиссер булып эшләгән Илсур Садыйков вафат. Якыннарының авыр кайгысын уртаклашабыз. Урыны җәннәттә булсын», диелә бу хәбәрдә.
Илсур Садыйков 1985 елда телевидениегә килә. Туксанынчы еллар башында ул язучылар, җырчылар, драматурглар һәм башка иҗат әһелләре белән программалар төшерә. «Телеобозрения недели» («ТОН») тапшыруының авторларының берсе. Соңгы эш урыны «Хәбәрләр» тапшыруында режиссер вазифасында булган.
Соңгы айларда Садыйковлар гаиләсенә шактый сынау килә. Җәй көне Илсур Садыйковның кече сеңлесен җирлиләр, соңгы ай ярым эчендә бер-бер артлы әнисе һәм әтисе дә вафат була. Бу турыда «Татарстан» ДТРК хәбәр итте.
Зөлфәт Хәким сценарие буенча «Классташ» фильмының куючы режиссеры, продюсеры Илсур Садыйков булган.