Әтнә районында янгын сүндерүчеләр ут капкан сарайдан 83 яшьлек карчыкны коткара
Әтнә районы Күшәр авылында Фрунзе урамындагы берничә корылмада ут чыга. Янгын сүндерү хезмәткәрләре ялкын капкан сарайдан 83 яшьлек ханымны чыгарып, үлемнән коткара. Бу хакта “Татар-информ” агентлыгына Россия Гадәттән тыш хәлләр министрлыгының Татарстан буенча Дәүләт идарәсе матбугат хезмәтендә хәбәр итәләр.
Янгын чыккан урынга 108 нче янгын-коткару часте хезмәткәрләре бара. Алар килгән вакытта, терлек сараен һәр яклап ут чолгап алган була. Торак йорт түбәсеннән дә төтен чыгып торган, мунча түбәсеннән дә ут телләре күренгән. Янгынны сүндерү өчен 30 минуттан артык вакыт кирәк булган.
Янгын нәтиҗәсендә, сарай һәм йорт түбәсе янып беткән. “Кызыл әтәч” барлыгы 200 квадрат метр мәйданны юк иткән. Ут сүндергәндә алар 83 яшьлек ханымны коткара. Карчыкны хастаханәгә озаталар. Янгынның сәбәбе электр җиһазларын кору кагыйдәләрен бозуда дип фаразлана.