Әтиләре тыштан бикләп калдырган өйдә ике нәни малай һәм аларның бабасы янып үлгән

Кырымның Сак районындагы Геройское авылында 2 октябрьдә кичке якта янгын була. Биредә бабай һәм аның ике оныгы янып үлә. Бу турыда «Вести» каналы хәбәр итте.

Өлкә буенча Тикшерү идарәсе мәгълүматы буенча, шәхси йортта янгын сүндергәндә 50 яшьлек ир-ат, 5 һәм 2 яшьлек ике нәни малай мәете табыла. Алар бабай һәм оныклар булуы ачыклана.

Балаларның әти-әнисе бу кичтә кунакка киткән булган. «Йорт ишеген әти кеше тыштан бикләп калдыра, ача торган җайланманы үзе белән алып китә. Әти кеше балалар моңа кадәр өйдән чыгып киткәләве турында сөйли. Ул шуңа күрә ишекне тыштан бикләп йөри», диелә Тикшерү идарәсе хәбәрендә.

Якынча версия буенча, янгын балалар шуклыгы аркасында килеп чыгуы ихтимал. Фаҗига урынын тикшергәндә, ут чыккан шкафта шырпылар табылган. Тикшерүчеләр малайлар ут белән уйнагандыр дип фаразлый.

Хокук саклаучылар искәрткәнчә, гаиләне былтыр махсус хисапка куйганнар. «Саксызлык аркасында үлемгә китерү» маддәсе буенча җинаять эше ачылган.