Әти-әнисе белән су коенганда алты яшьлек малай батып үлгән
Фаҗига килеп чыгу сәбәпләрен ачыклау буенча тикшерү бара.
Башкортстанда су коенганда алты яшьлек малай батып үлгәннән соң тикшерү башланган. Бу хакта «Башинформ» агентлыгы хәбәр итә.
Малай әти-әнисе һәм 9 яшьлек абыйсы белән су коенган. Бер мәлне бала юкка чыккан. Әти-әнисе улларын үзләре эзләгән, әмма таба алмаган. Алар коткаручыларга һәм хокук саклау органнарына мөрәҗәгать иткән.
Икенче көнне Гадәттән тыш хәлләр министрлыгы коткаручылары судан баланың мәетен чыгарган. Ачыкланганча, бу участок коену өчен җиһазланмаган булган.
«Тикшерүчеләр һәлакәт урынын тикшерә һәм фаҗига килеп чыгу сәбәпләрен ачыклауга юнәлдерелгән чаралар үткәрә», диелгән төбәк Тикшерү комитеты матбугат хезмәте хәбәрендә.