«Әти-әниләргә — сабырлык»: кемнең балалары бүген чәчәкләр тотып 1 класска китте?
1 сентябрь — Белем бәйрәме. Социаль челтәрләр аклы-каралы мәктәп киеме кигән, кулларына чәчәк бәйләме тоткан балалар белән тулган. Эстрада йолдызлары арасында да балаларын тәүге тапкыр мәктәпкә озатучылар бар.
Фирдүс Тямаевның улы Раян беренче сыйныфка бара. Кулына роза чәчәкләре тоткан Раян классташ кызны җитәкләп бара. Ул хәзер «1И» сыйныфы укучысы. Балалар алдыннан «1И» язмасын күтәреп укытучылары бара. Инстачылар арасында укытучыны Фирдүснең хатыны Резедага охшатучылар да табылган.
«Бәй, инәсе нишләп йөри алай итеп? Матур түгел болай кылану», — дип язганнар. Җавап итеп: «Ул бит әнисе түгел, ә укытучысы. Игътибар белән карагыз. Чәчләре белән генә Резедага охшаган», — дип язган бер ханым.
Иркәнең кызы Әминә дә тәүге тапкыр мәктәпкә бара. «Беренче кыңгырау. 1нче сыйныф… Без бүген бик дулкынланып, беренче тапкыр Әминә белән мәктәпкә килдек. Бәйрәм белән! Бар яктан да уңышлар телим, балам», — дип язган җырчы Инстаграм аккаунтында. Фотода бала күзен йомып чыккан.
«Әминәнең бөтенләй мәктәпне күрәсе килми бугай». «Әминәнең йокысы туймаган», дип шаяртып комментарийлар язып калдырганнар.
Ландыш Нигъмәтҗанованың Гүмәче дә мәктәп баласы булды. «1 сентябрь бәйрәме белән!!! Минем Гомәрем дә 1 сыйныфка китте. Хәзер бездә 3 укучы. Барлык балаларга зурдан зур уңышлар!» — дип язган җырчы.
Айсылу Лерон икенче баласын да мәктәпкә озата. «Быел мәктәпкә икәүләшеп баралар! Фәридә 4 сыйныфта, ә Нурихан 1 класста укыячак! Уңышлы уку еллары булсын. Балаларыбыз тырышып укысын. Ә безгә — әти-әниләргә сабырлык телим! Белем көне белән, дуслар», — дип язган ул.