Әти кеше янып торган бензинлы табакны алган һәм ялгыш нәни кызы өстенә сипкән

Ростов өлкәсендә 41 яшьлек ир-атны хөкем итәләр. Ул үзенең алты яшьлек кызы өстенә янып торган бензин сипкән. Бала һәлак булган. Бу турыда «КП — Ростов-на-Дону» хәбәр итте.

Фаҗига Шахты шәһәрендә була. Ир-ат ял көнендә алты яшьлек яраткан кызын бакчадан иртәрәк ала. Алар өйдә хуҗалык эшләрен эшләп йөри, хатыны эштә була. Өйдә ун яшьлек уллары да була. Ул әтисеннән сорап шырпы ала һәм ишегалдында матур шәмнәр яндыра. Әти кеше рөхсәт итә.

Шуннан соң әти кеше янкормада урнашкан остаханәсенә китә, машинасын төзәтә. Аның детальләрен сүтеп ала, шуларны техник бензин белән чистарта башлый. Бензинны металл табакка салып тора. Аннары әти кеше моннан чыгып китә. Шул мизгелдә бирегә улы йөгереп керә, кулында яна торган шәмнәре була.

Малай яна торган шәмне бензинлы табак янына алып килә һәм бензинга ут каба. Ул йөгереп әтисенә әйтергә китә.

Ир-ат чабып килә һәм утлы табакны алып, ишеккә йөгерә. Ул утны урамда сүндермәкче була, остаханәгә ут кабар дип курка.

Алты яшьлек кыз бала тавышларны ишетеп, бирегә йөгереп килә. Ул остаханәгә кергәндә, утлы табак тоткан әтисенә бәрелә. шулай итеп утлы сыеклык баланың өстенә сибелә.

Ир-ат кызындагы утны сүндермәкче була, үзе имгәнә. Аларның икесен дә ашыгыч ярдәм белән хастаханәгә алып киләләр. Ләкин тәненең 60 проценты пешкән баланың гомерен саклап кала алмыйлар, ул үлә.

Әти кешене хөкем итәләр. Суд аны бер елга ирегеннән мәхрүм итә, диелә хәбәрдә.