Теш дәвалаган вакытта өч яшьлек малайның йөрәге туктаган
Баланы әти-әнисе стоматологка алып килгән булган.
Дагыстанның Махачкала шәһәрендә стоматолог тешен дәвалаган вакытта өч яшьлек малай үлгән. Бу турыда Россия Тикшерү комитетының Дагыстан буенча Тикшерү идарәсенең матбугат хезмәте хәбәр итте.
Дәвалаган вакытта баланың хәле китә һәм аның йөрәге туктый. Малай табиб креслосында утырган килеш комага китә. Стоматологлар балага реанимация ясап карый, аннары аны ашыгыч ярдәм белән хастаханәгә алып китәләр. Бала ике көн хастаханәдә ята һәм 2 октябрьдә вафат була.
«Вакыйганың сәбәпләрен ачыклау өчен бөтен медицина документлары алынды, суд экспертизалары билгеләнде», диелә хәбәрдә.
Кулланучының иминлеген тәэмин итми торган хезмәтләр күрсәтү, саксызлык аркасында кеше үлеменә китерү маддәсе буенча җинаять эше ачылган, диелә бу хәбәрдә.