«TatarSu»: Киров дамбасы барлык казанлыларның яраткан урыны булачак

TatarSu нәрсә ул

«TatarSu» («Татар суы») – Казансу ярында Кремль белән Киров дамбасы арасында төзелә торган яңа иҗтимагый су кластеры. Бу участок тарихында беренче тапкыр, уңайсыз бушлык урынына, су коену, спорт, гаилә ялы һәм йөреп кайту өчен зона барлыкка киләчәк.

Архитекторлар уйлавынча, ул Кремль яр буен дәвам иттерәчәк һәм аны Адмиралтейство бистәсе янындагы яшел зоналар белән тоташтырачак.

Казан Кремленә караган Иҗтимагый киңлек шәһәр халкы һәм туристлар өчен яңа тарту ноктасы буларак уйланылды – Кабан яр буе кебек популяр урыннар мисалында.

Архитекторлар яңа территорияне яшелләндерүгә һәм төзекләндерүгә аерым игътибар бирделәр.

«Уңайлы мохит булдыру өчен, күләгәле зоналар һәм яшел акцентлар каралган. Яктырту функциональ яктан да, декоратив яктан да эшләнгән. Бу – куркынычсызлыкны тәэмин итү һәм кичке вакытта архитектураны ассызыклау өчен ясалган», – дип сөйләде «Татар-информ» га төзүче.

Проект ачык пространство форматында тормышка ашырыла: яр буйлары, велосипед юллары, фудкортлар, бассейннар һәм уен зоналары һәркем өчен ачык булачак.

Барысы да ничек башланды

Участокта эшләр 2023 елның җәендә башланды. Ул вакытта ук Татарстан Рәисе Рөстәм Миңнеханов һәм Казан мэры Илсур Метшин бу яр буе зонасын үстерүнең мөһимлеген ассызыкладылар – тулы кыйммәтле инфраструктура булдыру һәм халык өчен һәркем файдалана алырлык итү.

«Иң мөһиме – кешеләр. Аларга уңайлы булырга тиеш. Машина белән килергә, машина куярга. Таксига утырырга», – дип билгеләп үтте Рөстәм Миңнеханов.

Проект Татарстан шәһәрләрен үстерү институты һәм Казан мэриясе катнашында эшләнде. Аннары аны шәхси кулларга тапшырдылар.

Архитекторлар, экологлар һәм тарихчылар белән киңәшләшкәннән соң, Кремльгә панорама күренешен сакларга, саклау зонасын исәпкә алырга һәм ярларны табигый баланс саклап төзекләндерергә карар кылынды.

Ачыклык һәм аңлаешлылык – концепция нигезендә

Пространствоны планлаштыруга авторлык якын килүе «TatarSu»ны шәхси ял итү зонасы түгел, ә шәһәр тормышының бер өлеше итә.

Проектның нигезен ачык маршрутлар тәшкил итә: тышкы променад Кремль яр буе белән тоташа, ә эчке юллар функциональ зоналарны тоташтыра. Аз хәрәкәтләнүче гражданнар өчен пандуслар, парковкалар һәм уңайлы навигация планлаштырылган.

Трасса буендагы тавыштан саклаучы экраннар үтә күренмәле материалдан эшләнәчәк. Мондый карар Татарстан Рәисе йөкләмәсеннән соң кабул ителде: Кремль панорамасы белән визуаль элемтәне саклап калу һәм Казанның төп символын япмау мөһим.

«Рөстәм Миңнеханов Киров дамбасындагы саклагыч экраннарны үтә күренмәле экраннарга алыштырырга кушты. Казан Кремле белән шәһәр халкы һәм кунаклары киләчәктә дә соклана алачак», – дип хәбәр итте республика җитәкчесе ярдәмчесе Олеся Балтусова.

Яңа транспорт схемасы һәм инфраструктурасы

«TatarSu» төзелеше шәһәр үзәгенең транспорт схемасына үзгәрешләр кертәчәк. 2025 ел ахырына кадәр Сәет Галиев урамындагы юл узелын реконструкцияләү, трамвай юлларын яңарту, яңа светофорлар урнаштыру һәм җәяүлеләр кичүләрен төзекләндерү планлаштырыла. Төзүче фикеренчә, бу – Казанның теләсә кайсы ноктасыннан курортка уңайлы керү мөмкинлеген тәэмин итәчәк.

Төзелешне тәмамлауның планлы срогы – 2026 ел. Экологик экспертиза һәм яр буе линиясен саклап калуга бәйле вакытлы төзәтмәләргә карамастан, проект белдерелгән темпта бара.

«Татар-информ»га инвесторларның берсе сөйләгәнчә, бүген үк инженерлык инфраструктурасы булдырыла, булачак объектларны төзекләндерү һәм проектлау эшләре алып барыла.

Бушлык урынында нәрсә барлыкка киләчәк: «Tatarsu»ның 4 зонасы

«TatarSu» үз эченә 4 функциональ зонаны алачак: кунакханә комплексы, пляж кластеры, padel-үзәк һәм мунча блогы.

· 500 номерлы кунакханә (2 га)

Кунакханә комплексы 2 гектардан артык мәйданны биләячәк. Бу участок Адмиралтейство бистәсенә иң якын урнашачак.

Кунакханәнең үзәк бинасы Казансу елгасы янында урнашачак. Моннан тыш, проектта спа-комплекслы корпуслар һәм конференц-заллар каралган. Кунаклар өчен парковка автомобиль юлы янында урнашачак.

· Бассейннар һәм фудкортлар зонасы (3,3 га)

«TatarSu» җәмәгать пространствосының икенче өлешен 3,3 гектар мәйданлы участок биләячәк, һәм пляж зонасы булачак.

Территориядә шезлонглы 2 ачык бассейн; актив ял итү өчен уен мәйданчыклары; пляж комплексы администрациясе (2 мең кв. метрдан артык), ресторан (579 кв. метр), фудкорт (770 кв. метр) һәм 2,6 мең кв. метр мәйданлы спа-үзәк урнашкан 4 корпус каралган.

Бу зонаның төп өлеше булып су өлеше тора: бассейн һәм фонтаннар 4 мең кв. метрга якын тәшкил итәчәк. Бу – зонага визуаль җиңеллек бирәчәк һәм, урбанистик форматка карамастан, табигый мохиткә якынлык хисен тәэмин итәчәк.

Төзекләндерү күзлегеннән караганда, пляж зонасы кунакханә кластеры белән чагыштырганда «ачык» булачак. Яшелләндерү мәйданы якынча 6 мең кв. метр тәшкил итәчәк.

Моннан тыш, 4 мең кв. метрдан артык асфальт һәм 13 мең кв.метрга якын брусчатка җәеләчәк.

· Padel-үзәк зонасы (1,8 га)

Өченче функциональ зона спортка багышланачак. Padel-үзәк өчен 1,8 гектар җир бүлеп бирелгән, һәм әлеге мәйдан Казанда бу уен өчен махсуслаштырылган мәйданчыкларның берсе булачак.

Падел – зур теннис һәм сквош элементларын берләштерә торган, бик тиз популярлаша бара торган команда спорты төре.

Эскиз проекты нигезендә, үзәктә 4 профессиональ падел-корт җиһазландырылачак. Комплекс пространствосы шулай ук спортчыларга һәм тамашачыларга уңайлы булу өчен инфраструктураны күздә тота.

Зонаны җәяүле юллар, куаклар һәм яшел утраучыклар бизәячәк.

· Мунча һәм ресторан (1,2 га)

«TatarSu» проектының дүртенче зонасы мәйданы буенча иң җыйнак булачак – 1,2 гектар, әмма шул ук вакытта иң атмосфералы зоналарның берсе булачак. Биредә 500 кунакка исәпләнгән ресторанлы мунча комплексы барлыкка киләчәк.

Төрле типтагы мунчалар булачак.

Кунаклар табигатькә һәм су өстенә карап ләззәтләнә алсын өчен, проектта панорама тәрәзәле 2 катлы бина каралган. Беренче катның биеклеге – 4 метр, икенчесенең биеклеге 3 метр булачак.

Мунча кластеры «TatarSu»ның гомуми концепциясен төгәлли. Проект авторлары фикеренчә, монда актив ял, уңайлылык, спорт һәм сәламәтләнү өчен урыннар булачак.

Фотолар: үз чыганагыбыз тарафыннан бирелгән.

Чыганак: «Татар-информ», Эльза Кузнецова