Татарстанның атказанган артисты мобилизацияләнүчеләргә оекбашлар бәйләү өмәсендә катнаша
Татарстанның атказанган артисты Олег Фазылҗанов туган авылы – Балык Бистәсе районы Казаклар Чаллысы авылында мобилизацияләнгән якташларына ярдәм итү чарасында катнашкан.
«Махсус операциягә чакырылган авылдашларыбызга, аларның иптәшләренә җылы оекбашлар җибәрергә дип, өмәгә җыелыша башладык. Көн саен диярлек, өйдәге эшләрне бетерүгә, кич белән клубка чыгабыз. Инде шактый эш башкарылды. Өйләрендә бәйләп китерүчеләр дә бар», – дип хәбәр итә авыл китапханәсенең социаль челтәрдәге төркеме.
Фотолардан күренгәнчә, авыл кешеләре бергәләшеп йон эрли, аны ката, йомгалардан йон оекбашлар бәйли. Клуб бинасына җыелучылар арасында Татарстанның атказанган артисты Олег Фазылҗанов та бар.
«Ике ел элек Олег дәдәй үз нигезенә матур йорт салып куйды. Ялларында авылга еш кайткалый. Бәйрәмнәребездә дә, өмәләрдә дә катнашып тора. Олег Фазылҗанов – безнең авылның горурлыгы ул», – дип хәбәр итә театр артистының авылдашлары.
