Татарстанның атказанган табибы, балалар реаниматологы Игорь Закиров 48 яшендә вафат
Татарстан Сәламәтлек саклау министрлыгы мәрхүмнең якыннарының һәм туганнарының тирән кайгысын уртаклаша.
27 декабрьдә Татарстанның атказанган табибы, Балалар республика клиник хастаханәсенең анестезиология һәм реанимация бүлеге җитәкчесе, Сәламәтлек саклау министрлыгының балалар өчен анестезиология һәм реанимация буенча штаттан тыш баш белгече Игорь Закиров вафат булды. Аңа 48 яшь иде. Бу турыда Татарстан Сәламәтлек саклау министрлыгының матбугат хезмәте хәбәр итте.
Министрлык мәрхүмнең якыннарының кайгысын уртаклаша.
Игорь Закиров Краснодар өлкәсенең Тбилиси станицасында 1972 елның 21 маенда туган. Ижевск медицина институтында белем алган. Ул 25 елдан артык Казанда Балалар республика клиник хастаханәсендә эшли. Игорь Закиров гомерен медицинага багышлаган, ул даими рәвештә белем бирү семинарлары, мастер-класслар оештырган.
"Хезмәттәшләргә консультация кирәк булганда, бала кайда булуга карамастан, мин балага ярдәм итәргә тиеш булуыбызны тәгаен аңлыйм. Хезмәттәшләремә ярдәм итү минем өчен горурлык ул", - дип сөйләгән булган Закиров.