Бүген төнлә Төркиянең Аланья шәһәрендә җир тетрәгән, дип яза Төркия мәгълүмат чаралары. Тетрәү магнитудасы 3,9 дип хәбәр итә «CNN Turk».
«Мин гомеремдә беренче тапкыр шундый хис кичердем. Караватның йөреп торуыннан уянып киттем... Озан да (ире) шундук уянды. Минем бөтен тәнем калтырый башлады, без тиз-тиз киендек һәм аска таба киттек. Бездән ерак түгел шулай ук Аланьяда ял итүче дустыма яздым: «Син дә моны сиздеңме?» – дип. Ул «әйе» дип язган…» – дип тасвирлый хәлләрне Төркиядә яшәүче блогер @milasya_ts.
«Без урамга чыктык, отель хезмәткәрләре чәй өләшә. Алга таба нишләргә белмибез. Куркыныч», – дип өстәгән ул.
Блогер сүзләренчә, алар башта Бодрумга барырга теләгәннәр, әмма анда җир тетрәү ихтималы зур булганлыктан, Аланьягә юл тотканнар.
Алдарак профессор Нәҗми Герюр Аланьяда җир тетрәүләр булачагын кисәткән иде. Аланья төтенгә әйләнәчәк, дип китергән иде аның сүзләрен Төркия матбугат чаралары.
Видео @milasya_ts