#ТатарстандаЯсалган: «Ак Барс» киләсе уен сезонына яңа концепция тәкъдим итте
Үткән сезон җанатарларга «843» бренды белән истә калган иде.
Сезон башланырга бер көн калып бара. 2 сентябрь көнне яңа сезон «ЦСКА» — «Ак Барс» уены белән башланып китәчәк.
Бүген исә Казан клубы җанатарларга үзенең яңа концепциясен видео форматында тәкъдим итте. Концепция «#СделаноВТатарстане #ТатарстандаЯсалган #MadeInTatarstan» хэштеглары астында үтәчәк.
Клубның ролигы да бик кызык һәм креатив килеп чыккан. Видеода Татарстанны тасвирлаган әйберләр һәм хоккей арасында параллель уздырганнар. Мәсәлән, танылган театр артисты Ришат Әхмәдуллин тешен чистартканда, аның башы өстендә чәк-чәк килеп чыга, яисә «Казан» үзәгенең өсте түбәтәй белән алышынган.
Видео AZAT Sound Systemның «Матурым» җыры астында уза.
Җанатарлар үткән елгы концепцияләрне аңлап бетермәсәләр, «#ТатарстандаЯсалган» аларга ошый, күрәсең. Ролик астында күпләр «шедевр!», «шәп» дигән комментарийлар калдыралар.