Татарстанда зур тизлектә бара торган Lexus, юл кырыена чыгып, берничә тапкыр әйләнгән

Кичә Чаллы янында авариягә очраган Lexus йөртүчесе һәлак булган. Бу турыда «Татар-информ» хәбәр итте.

Фаҗига кичке уннар тирәсендә була. Чаллы – Водозабор трассасыннан зур тизлектә бара торган машина юл кырыена чыгып оча.

«Татар-информ» хәбәрчесе урыннан хәбәр иткәнчә, машина йөртүчесе идарәсен югалта, каршы як полосага чыга, аннары юл кырыена төшеп китә һәм берничә тапкыр әйләнеп каплана.

Җиңел машинаның саклык мендәрләре ачыла, кузовы бөтенләй диярлек җимерелеп бетә, тәрәзәләре ватыла.

«Авариядә машинаның 43 яшьлек йөртүчесе имгәнә, ул ашыгыч ярдәм машинасында үлә. Фаҗига сәбәпләре ачыклана», – дигән Россия Эчке эшләр министрлыгының Тукай районы буенча ЮХИДИ идарәсе башлыгы Шамил Ганиев.