Татарстанда юлга чыккан боланнар машиналарга комачаулап йөргән - видео
Җәнлекләрне Нурлат-Алексеевск трассасында күргәннәр.
Татарстан юлларында боланнар күренә башлаган. Аларны шаһитлар видеога төшереп алган. Җәнлекләр юлга чыгып баскан, алар узып бара торган машиналар хәрәкәтенә комачаулаган. Бу турыда «Татар-информ» хәбәр итте.
Шаһитлар сүзләренчә, бу хәл Нурлат-Алексеевск юлында, Биләр тирәсендә була.
Видео кадрларыннан күренгәнчә, бу хайваннар автомобильләрдән курыкмый. Бу марал токымлы боланнар булуы һәм җәнлекләр юлда бозлавык булмасын өчен сибелгән тозны яларга чыккан булуы ихтимал.