Татарстанда җылы һава торышы кайчанга кадәр сакланачак - синоптиклар
Республикада күпьеллык нормалардан 3-5 градуска югары һава температурасы саклана.
Татарстан территориясендә җылы һава торышы октябрь ахырына кадәр сакланачак. Бу хакта Татарстан Гидрометеорология һәм әйләнә-тирә мохитне күзәтү идарәсе тараткан фаразларда әйтелә.
Соңгы көннәрдә республикада күпьеллык нормалардан 3-5 градуска югары һава температурасы саклана. Россия Гидрометеорология үзәге фаразлары буенча, октябрьнең өченче декадасында үзгәрешләр булмаячак: термометр баганалары күпьеллык күрсәткечләрдән 5 градуска югары күтәреләчәк.
Шулай ук алдагы көннәрдә төбәктәге һава торышына көнбатыштан килгән циклонның атмосфера фронтлары да йогынты ясаячак. 25 октябрьдә республикада җылы циклон хөкем сөрәчәк. Атмосфера фронтлары нәтиҗәсендә, секундына 15-20 метр тизлектә исүче кискен җил көтелә. Көндез 14 градус җылы булачак.
26 октябрь төнендә яңгырлар көтелә. Көндез явым-төшемнәр туктаячак. Көндез һава температурасы +11 градус булачак.