Татарстанда яшүсмерне туп тидергән өчен кыйнап ташлаганнар
Җирдән тора алмыйча яткан малайга узып баручы кызлар «ашыгыч ярдәм» чакырган.
Чаллыда урам сугышыннан соң яшүсмерне «ашыгыч ярдәм» алып киткән.
«Челнинские известия» хәбәр иткәнчә, 40нчы мәктәпнең баскетбол мәйданчыгында 14 яшьлек малай икенче бер малайның битенә туп тидергән. Нәтиҗәдә малайның күзлеге ватылган. Ачуы чыккан малай туп тидерүчегә йодрыклары белән ташланган, җиргә егып салган. Шуннан соң ул бу урыннан качкан. Кыйналган малай исә җирдә ятып калган. Ул мөстәкыйль торып баса алмаган.
Узып баручы 10–11 яшьлек ике кыз «ашыгыч ярдәм» бригадасын чакырган. Малайны караганнан соң, табиблар төрле авырлыктагы травмалар булуын ачыклаган. Иң куркынычы — яңак сөяге сынган дигән шик туган.
Малайны хастаханәгә алып киткәннәр.
Имгәнгән малайның гаиләсе күптән түгел генә 46нчы комплекска күченгән. Бу малай 40нчы мәктәп укучысы түгел. Баланың әнисе шикаятен өйрәнүче инспектор мәктәптәге видеокүзәтү камераларының язмаларын караган. Карап торышка 16–17 яшьлек күренгән кыйнаучы малайны укытучылар танымаган.