Татарстанда бер ир-ат алты яшьлек үги улын җәзалап яшәгән
Күп балалы гаиләдә үги ата баласын типкәләп кыйнап торган.
Яшел Үзән районының Осиново бистәсендә яшәүче ир-атка карата ачылган җинаять эшен судка тапшырдылар. Ул алты яшьлек үги улын аяклары белән тибеп, коляска белән сугып кыйнаган. Бу турыда «Татар-информ» агентлыгына Россия Тикшерү комитетының Татарстан буенча Тикшерү идарәсе җитәкчесенең өлкән ярдәмчесе Андрей Шептицкий хәбәр итте.
Әлеге вакыйга күп балалы гаиләдә була. Алар Осиново бистәсендәге бер йортта фатир арендалап яшиләр. Алты яшьлек малай үги атасы һәм әнисе белән тора. Үги ата моңарчы хөкем ителгән кеше. Алар белән тагын ике нәни малай һәм бер кыз бала да яши. Балаларның кечесенә 1 яшь, иң олысына 8 яшь.
Тикшерү версиясе буенча, 34 яшьлек ир-ат 6 яшьлек үги улын даими рәвештә кыйный, суга, аяклары белән тибә, хәтта коляска белән дә суга.
Бер очракта үги ата кыйнаганнан соң бала имгәнә, сөякләре сына, аны хастаханәгә салалар.
Хәзер бу ир-атны кулга алганнар, ләкин ул үз гаебен танымый. Балигъ булмаган баланы җәзалау һәм аның сәламәтлегенә зур зыяны китерү турындагы җинаять эшен суд караячак.