Татарстанда яшәүче хатынны элеккеге ире көчләгән һәм үтергән
Ир-ат хатынын подъездда саклап торган һәм ишекне ачкач, фатирга бәреп кергән.
Татарстанда яшәүче 39 яшьлек ир-ат былтыр көз һәм кыш буена элеккеге хатынын эзәрлекләгән. Ул хатынның телефонына шалтыратып, үтерү белән янаган. Шулай итеп хатыныннан кабат үзе янына кайтуны таләп иткән. Бу турыда «Татар-информ» агентлыгына Россия Тикшерү комитетының Татарстан буенча Тикшерү идарәсе җитәкчесенең өлкән ярдәмчесе Андрей Шептицкий сөйләде.
Тикшерү версиясе буенча, 2020 елның 23 декабрендә ир-ат элеккеге хатынын подъезд янында сагалап тора. Аңа ияреп фатирга керә. Фатирда ир-ат хатынны кыйный, көчли, аннары электр чыбыгы белән буып үтерә. Шуннан соң ул җинаятен яшерү өчен, хатын үз-үзенә кул салган дип күрсәтмәкче була. Ир-ат хатынның фатирыннан акчаларны, кыйммәтле әйберләрне алып, чыгып кача.
Ир-атны тоткарлыйлар. Ул гаебен өлешчә генә таный. Бу кешегә карата «Үтерү белән янау», «Торакка законсыз үтеп керү», «Көчләү», «Үтерү», «Талау» маддәләре буенча гаепләү белдерелгән. Эшне судка тапшырганнар, диелә ведомство хәбәрендә.