Нурлат районының Мамак авылында алдан уйлап сәламәтлеккә авыр зыян салу, шул сәбәпле саксысызлык аркасында үлемгә китерүдә шикләнеп 34 яшьлек ир-атны тоткарлаганнар. Бу турыда Россия Тикшерү комитетының Татарстан буенча Тикшерү идарәсе җитәкчесенең өлкән ярдәмчесе Андрей Шептицкий «Татар-информ»га хәбәр иткән.
Тикшерү версиясе буенча, 4 июльдә ир-ат һәм аның 37 яшьлек сөяркәсе янына таныш хатын килә, ул гөмбәгә барырга тәкъдим итә. Өй хуҗабикәсе исерек килеш йоклап ята. Ир-ат исә таныш хатын белән гөмбәгә бара. Алар гөмбә җыя, аны саталар һәм самогон алып кайталар.
Кич белән сөяркә хатын тавыш куптара, ул ирнең башка хатын белән гөмбәгә баруын ошатмый, көнли. Шуннан соң ир сөяркәсен кыйнап ташлый.
5 июльдә иртән хатын хәле начар булуга зарлана. Ир-ат даруларга дип чыгып китә, ләкин кайтканда сөйгәне үлгән була, диелә хәбәрдә.
Ир-ат тоткарланган, тикшерү бара.