Лаеш районында яшәүче 29 яшьлек ир-атны 2 кешене – әнисен һәм апасын үтергән өчен хөкем иттеләр. Бу турыда «Комсомольская правда» яза.
Җинаять 2021 елның ноябрендә булган. Лаешның Лебедев урамындагы бу ир-атның фатирында анасы һәм анасының сеңлесе була. Исерек ир-ат анасының сеңлесе – апасы белән талаша башлый. Апа кеше аңа аракыга акча бирүдән баш тарта. Шуннан соң ир-ат ярсый һәм апасын буып үтерә. Әни кеше исә улын кызгана һәм җинаять турында беркемгә дә әйтми.
1 ай узгач, әни кеше полициягә хәбәр итәргә була. Ул улының апасын үтерүен сөйләп бирә. Ир-ат бу турыда белгәч, әнисен дә чалбар каешы белән буып үтерә.
Тикшерү вакытында бу ир-ат күрсәтмә бирүдән баш тарта, гаебен танымый. Эшне Татарстан Югары суды карый. Прокуратура аны 20 елга каты режимлы колониягә хөкем итүне сорый. Суд карары буенча, анасын һәм апасын үтергән ир-ат 19 елга ирегеннән мәхрүм ителә, диелә хәбәрдә.