Бүген, 5 ноябрьдә, Татарстанда һава шартлары сизелерлек начарланачак. Бу хакта Татарстан Гидрометеорология үзәге хәбәр итә.
Республика күген болыт каплаячак. Бераз дәрәҗәдә яңгыр һәм юеш кар явачак. Казанда явым-төшем урыны белән, нигездә, юеш кар рәвешендә көтелә. Көндез кайбер урыннарда, шул исәптән Татарстан башкаласында да, кыска вакытлы буран булырга мөмкин. Төнлә урыны белән күзәтелгән томан кояш чыкканнан соң таралачак.
Көнбатыштан һәм төньяк-көнбатыштан секундына 6-11 метр тизлектә җил исәчәк. Көндез аның тизлеге урыны белән секундына 14 метрга кадәр көчәергә мөмкин. Республика юлларының аерым участокларында, шул исәптән Казанда да, бозлавык барлыкка килүе ихтимал.
Төнлә һава температурасы -2..+2 градус тәшкил итсә, көндез республикада 0..+4 градуска кадәр күтәреләчәк. Казанда һава +1..+3 градуска кадәр җылыначак, дип яза «Татар-информ».