Чирмешәндә янгында кыз бала һәлак булганнан соң, гаеплеләрне җәзага тартуны таләп итәләр

8 гыйнварда Татарстанның Чирмешән районында шәхси йортта янгын чыгып, 7 яшьлек кыз бала һәлак була, аның әнисе агуланып, аңын югалта. Чирмешән районы прокуратурасы әлеге янгын буенча тикшерүне тәмамлаган, дип яза «Татарстан 24» сайты.

Тикшерү балигъ булмаган балаларның караучысыз булуын күзәтүдә тотучы җаваплы органнарның эшендә җитди тайпылышлар ачыклаган. Гаиләнең имин булмавы турында мәгълүмат булса да, профилактика органнары тиешле чаралар күрмәгән.

Закон бозган органнар җитәкчеләренә гаепле хезмәткәрләрне дисциплинар җаваплылыкка тарту таләбе куелган.

Хәзер баласы үлгән хатын-кызны калган ике баласына карата аналык хокукларыннан мәхрүм итү мәсьәләсе карала. Әлегә балаларны якын туганнары карый.

Искәртеп үтик, 8 гыйнварда Чирмешән авылында бер катлы бүрәнә йортта янгын чыга. Янгын сүндерүчеләр ут эченнән хатын-кыз белән баланы коткара, аларны Чирмешән хастаханәсенә алып китәләр.

Реанимация чаралары уздырсалар да, 2016 елгы кыз бала вафат була. Аның әнисе, 1987 елгы хатын-кыз, комага китә.