Татарстанда ял базасында бер ир хатынының кабыргаларын сындырган
Ир белән хатын сугышкач, шаһитлар полиция чакырткан.
Тукай районында урнашкан ял базаларының берсендә гаилә драмасы булган. Ир белән хатынның сугышы турында полициянең дежур бүлегенә шалтыратып әйткәннәр. Бу турыда Татарстан буенча Эчке эшләр министрлыгының матбугат хезмәте хәбәр итте.
Урынга килгән полиция хезмәткәрләре ачыклаганча, биредә Чаллыдан килгән ир белән хатын ял итә. Алар табын корып, спиртлы эчемлекләр эчеп утыра. Аннары ир белән хатын талаша башлый. Талаш сугышка әверелә. Шулай итеп, 34 яшьлек хатында пневмоторакс була (корсак куышлыгына һава җыела). Аның кабыргалары да сына. Имгәнгән хатынны хастаханәгә илтәләр. Аның ирен хокук саклаучылар тоткарлый.
«Алдан уйлап сәламәтлеккә зыян китерү» маддәсе буенча җинаять эше ачылган. Бу маддә буенча ирне 8 елга кадәр ирегеннән мәхрүм итүләре ихтимал, диелә бу хәбәрдә.