2026 елның беренче биш аенда Татарстан Республикасында уртача айлык хезмәт хакы 97 264 сум тәшкил иткән. Бу узган елның шул ук чоры белән чагыштырганда 16,5%ка күбрәк. Аерым алганда, май аенда уртача хезмәт хакы 104 722 сум булган, еллык үсеш 17,4% тәшкил иткән. Бу мәгълүматлар Росстатның 2026 елның гыйнвар–июнь айларындагы Россиянең социаль-икътисади хәле турындагы докладында китерелә.
Шул ук вакытта Татарстан Идел буе федераль округы төбәкләре арасында оешма хезмәткәрләренең уртача номиналь исәпләнгән хезмәт хакы күләме буенча беренче урында кала. Бу турыда «Татар-информ» яза.
Быелның беренче биш ае нәтиҗәләре буенча Идел буе төбәкләре арасында икенче урында Пермь крае урнашкан – анда уртача хезмәт хакы 88 156 сум булган (бер ел эчендә үсеш – 11,5%). Өченче урында – Удмуртия, анда бу күрсәткеч 85 416 сум тәшкил иткән (үсеш – 17,2%).
Май аен гына алганда да, хезмәт хакы күләме буенча икенче урында Пермь крае тора – 93 140 сум (еллык үсеш – 9,1%), өченче урында Удмуртия – 89 589 сум (үсеш – 16,3%).
Бөтен Идел буе федераль округы буенча гыйнвар–май айларында уртача номиналь хезмәт хакы 81 901 сум тәшкил иткән, бу узган ел белән чагыштырганда 12,2% күбрәк. Май аенда ул 86 554 сум булган (үсеш – 11,3%).
Россия буенча беренче биш айда уртача айлык номиналь хезмәт хакы 108 123 сум тәшкил иткән, еллык үсеш – 13,3%. Май аенда бу күрсәткеч 110 216 сум булган (10,1% үсеш).
Гыйнвар–май айларында хезмәт хакы иң югары булган төбәкләр арасында: Чукотка автономияле округы – 239 768 сум (үсеш – 14,7%); Мәскәү – 197 299 сум (үсеш – 15,6%); Магадан өлкәсе – 195 450 сум (үсеш – 20%).
Май аенда Мәскәү бишенче урынга төшкән: уртача хезмәт хакы 183 651 сум булган. Аны Чукотка автономияле округы (260 730 сум), Магадан өлкәсе (214 453 сум), Ямал-Ненец автономияле округы (205 365 сум) һәм Камчатка крае (198 784 сум) узган, диелә хәбәрдә.