Татарстаннан мобилизацияләнгән депутат яу кырында улы белән күрешүне көтә

Татарстаннан мобилизацияләнгән депутатлар арасында Актаныш районыннан Илсур Гизамов та бар. Илсур үзе Иске Кормаш авылыннан. Бу турыда «Актаныш хәбәрләре» яза.

«Өлешчә мобилизация башлангач, озак уйлап тормый, хәрби комиссариатка барып, махсус хәрби операциядә катнашу теләген белдерә. Күңелендә тынычлык булмагандыр. Контракт нигезендә хәрби хезмәттә булган улы хәрби операция башланган беренче көннән үк иң алгы сафта көрәшә. «Ул – теге яктан, мин бу яктан килеп күрешергә иде инде», – ди Илсур. Элемтәгә кереп, хәл белешеп сөйләшеп тә алдык. Бүгенге көндә Луганск өлкәсендә ул. Илсур Мөдәрис улына һәм мобилизация кысаларында хәрби чакырылышка киткән барлык райондашларыбызга исән-имин әйләнеп кайтырга насыйп булсын!» дип яза «Актаныш хәбәрләре».

Татарстанда өлешчә мобилизация вакытында барлыгы 13 депутат мобилизацияләнгән. Алар – Казаннан, Әлмәт, Менделеевск, Кама Тамагы, Чистай, Актаныш, Саба, Теләче, Баулы, Әгерҗе, Буа, Балык Бистәсе, Алексеевск районнарыннан. Шунысын да әйтергә кирәк, Россиядә өлешчә мобилизация игълан ителгәннән соң, ул барлык кешеләр өчен дә бертөрле булыр дип планлаштырыла: түрәләр өчен дә, гражданнар өчен дә. 

Хәзер мобилизацияләнгән депутатларның берсе махсус хәрби операция зонасында, җидесе махсус хәрби операция зонасыннан ерак булмаган урында дислокация урыны буенча хәрби частьләрдә, биш кеше Казан югары танк команда училищесында әзерлек уза.