Татарстанда Россия өчен уникаль булган «Татарстанда өйләнешүчеләр өчен грант» программасын озайттылар. Бу программа Татарстан Рәисе Рөстәм Миңнеханов инициативасы белән тормышка ашырыла. Проект яшь парларга 100 мең сум акча түләүне күздә тота, тик бу акчалар туйны милли стильдә оештыру өчен тотылырга тиеш. Бу хакта «Челнинские известия» газетасы яза.
Программада 3 критерийга туры килгән парлар катнаша ала: никах Татарстандагы ЗАГСта теркәлергә, ир белән хатынның берсе 35 яшьтән кечерәк булырга, икесе дә республикада кимендә 3 ел яшәгән булырга тиеш.
Республиканың яшьләр эшләре министрының беренче урынбасары Софья Галиева-Мостафина сүзләренчә, программа гаилә институтын ныгытуга һәм туй гореф-гадәтләрен заманча форматта саклауга юнәлгән.
Грантны туй уздыру мәйданчыгы, бизәү, музыкаль бизәлеш, милли костюмнар, полиграфия һәм бәйрәм тематикасына бәйле башка чыгымнар өчен тотарга була. Катнашу өчен «Татарстан хезмәтләре 2.0» кушымтасы аша гариза бирергә кирәк. Гаризада видеопрезентация, смета булырга тиеш һәм туйның концепциясен тасвирларга кирәк.
Гаризалар 15 ноябрьгә кадәр кабул ителә, ә туй сентябрь-октябрьдә узарга, шулай ук 2025 елның ноябрь-декабренә планлаштырылган булырга да мөмкин.