Татарстанда трактор белән авариядә биш кеше имгәнгән

17 ноябрь көнне кичке якта Зәй-Сухарево юлында авариядә биш кеше имгәнгән. Бу турыда НТР каналы хәбәр итте.

Түбән Кама буенча ЮХИДИ хәбәр иткәнчә, «ВАЗ-211440» машинасын идарә иткән 60 яшьлек йөртүче үзе белән бер якка баручы «Т-16» тракторына бәрелгән. Трактор белән 25 яшьлек егет идарә иткән.

Бәрелүдән соң трактор юл кырыена төшеп киткән. Җиңел машина исә каршы як полосага очып чыккан. Аңа «Лада Гранта» машинасы килеп бәрелгән.

Авария вакытында «ВАЗ» һәм «Лада» йөртүчеләренең һәм пассажирларының сөякләре сынган, шулай ук тракторчы да имгәнгән. Бу биш кеше барысы да хастаханәдә дәвалана, диелгән әлеге хәбәрдә.