Татарстанда тере песине яна торган мичкә ыргытканнар
Песинең ике тәпие дә янып беткән.
Алабуга районының Поспелово авылында тере песине яна торган мичкә ыргытканнар. Әлеге вакыйгадан соң хокук саклаучылар җинаять эше ачкан. Бу турыда Татарстан прокурорының өлкән ярдәмчесе Руслан Галиев «Татар-информ» агентлыгына хәбәр итте.
Мичтә янып имгәнгән песинең фотолары социаль челтәрләрдә чыкты. Такта яра торган оешмада эшләүче ир-ат аны мичкә ыргыткан булган. Песине уттан алганнар. Ләкин бу вакытта ул коточкыч имгәнгән. Песинең тәпиләре янган.
Имгәнгән хайванны ветеринарга алып килгәннәр. Ул тәпиләрне саклап калып булмавын ачыклаган. Песи үз йөри алмый. Аны гомерлек җәзага хөкем итмәс өчен, йоклатып үтерергә карар кылганнар.
Бу хәбәр интернетта таралгач, прокуратура тикшерү башлаган. Аннары хайваннарга карата садист ысуллары кулланып, вәхшилек турында җинаять эше ачылган, диелә хәбәрдә.
