Татарстанда скутердан егылып төшкән яшүсмер поезд астында калган
Йөк составы килгән мизгелдә тимер юл өстенә скутер пассажиры килеп төшкән.
Татарстанның Яшел Үзән районында яшүсмер бала поезд астында калып һәлак булган. Малайлар скутерда йөргән вакытта фаҗига килеп чыга. Бу турыда «Татар-информ» агентлыгына Россия Тикшерү комитетының Идел буенда транспортта тикшерү идарәсе җитәкчесенең өлкән ярдәмчесе Дмитрий Захаров сөйләде.
1 майда көндезге икеләр тирәсендә Атлашкино тимер юл кичүендә үсмер малайны поезд бәрдереп китә. Скутерга утырган малайлар поезд каршына килеп чыга. Скутер пассажиры — 15 яшьлек малай егыла һәм йөк составы каршына тимер юлга килеп төшә.
Үсмер урында ук һәлак була. Скутер белән идарә итүче егет исә фаҗигане күрә һәм качып китә.
Урында тикшерүчеләр эшли.