Татарстанда сигез яшьлек малай ике сумлык акча йоткан
Балага Республика клиник балалар хастаханәсе табиблары ярдәм иткән.
Татарстанда сигез яшьлек малай ике сумлык тимер акча йотып җибәргән. Әти-әнисе кичекмәстән баланы Республика клиник балалар хастаханәсенә алып килгән. Бу турыда хастаханәнең социаль челтәрдәге сәхифәсендә хәбәр ителә.
«Безне бик тиз кабул иттеләр. Тиз генә сораштыргач, рентген ясадылар. Тимер акча баланың үңәчендә тыгылып калган. Балага укол ясадылар һәм акча тагын да аскарак төшеп китте, аннары ашказанында тукталып калды», — дип сөйли баланың анасы.
Тимер акча табигый юл белән чыгарга җыенмаган, шуңа күрә табиблар фиброгастродуоденоскопия (ФГДС) процедурасын уздырырга карар кыла. Шулай итеп югары категорияле табиб, эндоскопия бүлеге җитәкчесе Николай Поляков баланың эчендәге чит предметны чыгара.
«Бала бу процедураны ничек кичерер дип бик борчылдым. Ләкин табиблар шул ике сумны бик тиз генә табып алды. Рәхмәт аларга», — ди баланың анасы
Табиблар вак һәм очлы әйберләрне балалардан яшерергә киңәш итә. Әгәр бала вак предметлар йотса, кичекмәстән табибка мөрәҗәгать итәргә кирәк, диелә бу хәбәрдә.