«Сайлаулар» автоматлаштырылган дәүләт системасы мәгълүматларына караганда, 19 сентябрь 15:00 сәгатькә Татарстанда сайлаучыларның 50,3 проценты тавыш биргән. Бу хакта республиканың Үзәк сайлау комиссиясе рәисе Андрей Кондратьев Бердәм мәгълүмат үзәгендә узган матбугат конференциясендә сөйләде, дип яза «Татар-информ».
«Сайлаучыларга килгәндә исә, кәеф яхшы, актив тавыш бирәләр, барысы да штат режимында бара. Бүген сайлау участоклары барысы да үз вакытында ачылды», – диде Андрей Кондратьев.
Искәртеп үтик, 18-20 сентябрьдә республикада Россия Федерациясенең тугызынчы чакырылыш Дәүләт Думасына сайлаулар уза. Парламентка катнаш сайлау системасы буенча барлыгы 450 депутат сайланачак.
Шулай ук №50 Биектау бермандатлы сайлау округы буенча җиденче чакырылыш Татарстан Республикасы Дәүләт Советы депутатын өстәмә сайлаулар һәм өстәмә муниципаль сайлаулар үткәрелә. Республиканың барлык территориясендә сайлау участоклары 8:00 сәгатьтән 20:00 сәгатькә эшли.