Өлешчә мобилизация кысаларында Татарстаннан махсус хәрби операция зонасына 15 табиб чакыртылган булган. Бу хакта Татарстанның сәламәтлек саклау министры Марат Садыйков әйтте. Шулай ук, министр сүзләренчә, республика табиблары арасында хәрби операциягә үзе теләп китүчеләр дә бар, һәм алар тагын да күбрәк. Бу хакта «Казанские ведомости» сайты яза.
Министр сөйләгәнчә, мобилизацияләнгән табибларның бер өлеше алгы сафта, ә калганнары госпитальләрдә эшли. Татарстаннан хәрби операциягә киткән табиблар белән министрлык элемтәдә тора.
«Алар белән даими элемтәдә торабыз», – диде министр.
Марат Садыйков әйтүенчә, өлешчә мобилизация уздырылу аркасында, республиканың сәламәтлек саклау министрлыгы кадрлар кытлыгы кичерми, өстәвенә, Татарстан табиблары даими рәвештә Донбасска барып, андагы җирле табибларга да булыша. Аерым алганда, алар Татарстан шефлыгында булган Лисичанск шәһәре хастаханәләренә бара.
Алдарак «Казанские ведомости», Әлмәттән балалар хирургы Кирилл Булатов хәйрия колоннасы составында Лисичанск шәһәренә барачак, дип хәбәр иткән иде. Табиб Лисичанскида берничә ай медицина ярдәменнән мәхрүм калган балалар өчен профилактик тикшерүләр оештырырга ниятли.