Татарстанда микродулкынлы мичтә йомырка пешерергә маташкан баланың бите пешкән
Өйдә иннек ясарга җыенган кыз да имгәнгән.
Республика балалар клиник хастаханәсе табибы Владимир Линьков балалар өчен куркыныч булган лайфхаклар турында сөйләгән. Бу турыда хастаханәнең инстаграмдагы сәхифәсендә хәбәр ителә.
Табиб балаларны интернетта таралган төрле лайфхаклардан сакларга чакыра. Ул Татарстанда мәктәптә укучы малай интернеттан тапкан киңәш аркасында чак кына исән калуын әйтә. Бала микродулкынлы мичтә йомырка пешерергә маташа. Ул су кайната, йомырканы шунда сала һәм мичкә куя. Савытны мичтән алганда бер йомырка шартлый. Баланың бите, муены, күкрәгендәге тән тиресе пешә.
«Баланы безгә бу айда китерделәр. Ул әле дә хастаханәдә дәвалана. Безгә килгәндә аның бите шешкән, күзләре дә ачылмый иде. Хәзер шеше бетте инде, аңа табиблар ярдәм итә. Офтальмологлар белән бергә дәвалыйбыз», — ди Владимир Линьков.
Тагын бер бала өйдә иннек ясау белән эксперимент ясарга маташкан. Ул төрле матдәләрне кушып, пластик савытта болгаткан. Аннары савытны мичкә куйган. Бу очракта да шартлау була. Баланы хастаханәгә китерәләр, аңа җиңелчә зыян килгән. Табиблар ярдәм күрсәткәч, аны өенә кайтарып җибәргән.
Табиб әти-әниләрне сак булырга һәм балаларын контрольдә тотарга чакыра.