Балык Бистәсе район суды Чаллыда яшәүче 60 яшьлек ир-атка хөкем карары чыгарды. Ул юлда йөрү кагыйдәләрен бозу аркасында кеше сәламәтлегенә авыр зыян китерүдә гаепле дип табылган. Бу хакта «Татар-информ» хәбәр итә.
ТР прокуратурасы матбугат хезмәте хәбәр иткәнчә, юл-транспорт һәлакәте 2024 елның 1 ноябрендә «Волга» М-7 трассасының 915 нче километрында була. Чаллы кешесе «Mercedes-Benz» йөк автомобиле белән идарә иткәндә йоклап китә һәм юл читенә чыга. Анда ул «Renault Arkana» автомобиле белән бәрелешә.
Юл-транспорт һәлакәтендә 2017 һәм 2024 елгы ике бала зыян күрә. Суд йөк машинасы йөртүчесенә 2 елга иреген чикләү карарын чыгарды һәм аны шул ук срокка машина йөртү хокукыннан мәхрүм итте, диелә хәбәрдә.
