Татарстанда мәктәп бәдрәфендә кеше үлгән
Фаҗига Теләче авылындагы урта мәктәптә булган.
Татарстанда мәктәп бәдрәфендә 55 яшьлек слесарь һәлак булды, дип Россия Тикшерү комитетының Татарстан буенча идарәсе матбугат хезмәте хәбәр итте.
Якынча мәгълүматлар буенча, Теләчедә мәктәп директоры ишегалды себерүчегә, завхозга һәм слесарьга иске бәдрәфне сүтәргә кушкан. Бу кешеләрнең берсе дә эш алдыннан әзерлек узмаган, махсус шәхси саклану чаралары булмаган, дип ассызыклана әлеге хәбәрдә.
Бәдрәфне сүткәндә, стена җимерелеп төшкән. Слесарь стена астында калган һәм җитди имгәнгән.
Табибларның тырышлыгына карамастан, бу кеше хастаханәдә җан биргән.
Җинаять эше кузгату буенча эш бара, диелгән әлеге хәбәрдә.