Татарстанда коточкыч авариядә өч кеше һәлак булган
Трассада зур йөк машинасы белән җиңел автомобиль бәрелешкән.
Бүген көндезге өчләр тирәсендә Яшел Үзән районында Сафоново-Помары юлының 14нче километрында коточкыч авария була. Бу турыда «Татар-информ» агентлыгына Татарстан буенча Эчке эшләр министрлыгының матбугат хезмәте хәбәр итте.
Якынча мәгълүматлар буенча, «Лада» машинасы каршы як полосага чыга һәм «Скания» йөк машинасы белән кара-каршы бәрелешә. «Лада» белән 42 яшьлек ир-ат идарә итә.
Шаһитлар төшереп алган видео кадрларыннан күренгәчә, йөк машинасы юлга аркылы диярлек баскан. Җиңел автомобиль юл кырыена төшеп киткән. «Логистика үзәгеннән соң... Анда мәетләр», — ди видеоны төшерүче кеше.
«Авариядә җиңел машинаның йөртүчесе, 39 һәм 29 яшьлек ике пассажиры һәлак булды», — дип хәбәр иттеләр ведомствода.