Татарстанда коткаручылар машинаның бензин багына кулы кысылып калган хатын-кызга ничек ярдәм иткәннәр?
Теләче районында коткаручылар бензин багында кулы кысылган ханымга булышкан. Бу хакта Россия Гадәттән тыш хәлләр министрлыгының Татарстан буенча идарәсе матбугат хезмәтендә хәбәр иттеләр.
Кичә көндез ашыгыч хезмәтләрне чакыру буенча 112 хезмәтенә М7 трассасының 897 нче километрында Удмуртия Республикасы номерлары белән “Рено” машинасын йөртүче хатын-кызның кулы бензин багында кысылуы турында хәбәр килеп ирешә.
Чакырылган урынга Олы Нырсы авылыннан янгын сүндерү хезмәткәрләре һәм 5 нче эзләү-коткару отряды вәкилләре килгән. Махсус гидравлик корал ярдәмендә алар хатын-кызның кулын чыгара. Ханым Котлы-Бүкәш авылының ашыгыч ярдәм хезмәткәрләренә тапшырыла.