Киләсе атнада Татарстанда җылы һава торышы сакланачак. Бу хакта «Татар-информ»га «Метео» фаразлау үзәге җитәкчесе Александр Шувалов хәбәр иткән.
Синоптик сүзләренчә, Европа территориясенең төньяк-көнбатышында һәм төньягында циклоннар урнашуын дәвам итәчәк, ә уртача киңлекләр, шул исәптән Татарстан, көньяк-көнбатыш һәм көньяк агымнар йогынтысында кала. «Бу яңгырлар булмаячак дигән сүз түгел. Яңгырлар явачак. Әмма алар озакка сузылмый һәм көчле булмый. Көчле, тирән циклоннар көтелми. Һава температурасы 15–19 градус тирәсендә була. 20 градус турында әлегә бераз саклык белән әйтер идем, әмма сентябрьнең 20нче числолары өчен 15–19 градус — яхшы температура», — дип билгеләп үтте Шувалов.
Татарстан Гидрометеорология үзәге мәгълүматлары буенча, 18 сентябрьдә республикада аязучан болытлы һава торышы була, явым-төшемсез диярлек. Төнлә һава температурасы +2...+7 градус, ә көндез аерым районнарда +17...+22 градуска кадәр күтәрелергә мөмкин. 19 сентябрьдә дә аязучан болытлы һава торышы, явым-төшемсез диярлек көн фаразлана. Төнлә +3...+8, көндез +18...+23 градус булачак.
Элегрәк синоптиклар Татарстанда чираттагы «әбиләр чуагы» дулкыны октябрьдә булырга мөмкинлеген, ә сентябрьнең икенче яртысында һава температурасы климатик нормадан 1–1,5 градуска югарырак булачагын искәрткән иде.