Татарстанда кайсы юлларда 110 км/сәг тизлектә йөрергә рөхсәт ителде?
Питрәч, Балык Бистәсе, Теләче, Мамадыш һәм Алабуга районнары аша юлда үзгәрешләр 30 сентябрьгә кадәр гамәлдә булачак.
Татарстан трассаларының кайбер участокларында рөхсәт ителгән тизлекне 110 км/сәгатькә кадәр арттырдылар. Бу хакта «Татар-информ»га республиканың Дәүләт автомобиль инспекциясендә хәбәр иттеләр.
9 июньнән башлап М7 трассасында җиңел машиналарга һәм 3,5 тоннага кадәр авырлыктагы машиналарга ике юнәләштә дә 110 км\сәг тизлек белән йөрергә ярый.
Бу Питрәч, Балык Бистәсе, Теләче, Мамадыш һәм Алабуга районнары аша уза торган юл участокларына кагыла.
ЮХИДИ хезмәте шулай ук, тагын ике участокта рөхсәт ителгән тизлекне 80 км/сәгатькә арттыруны планлаштыра. Үзгәрешләр Мамадыш трактында — Интернациональ урамы киселешеннән Казанга чыгу юлына кадәр булачак. Горький шоссесында да үзгәрешләр көтелә — Залесная урамы, 118нче йорттан башлап, шәһәрдән чыгуга кадәр тизлек арттырылачак.
Җиңел автомобильләр өчен тизлек режимы Казан — Яшел Үзән трассасының Идел аша күпер чатыннан соңгы участогында 100 км/сәгатькә кадәр арттырылган инде.
Барлык үзгәрешләр 30 сентябрьгә кадәр гамәлдә булачак.
