Татарстанда Кама елгасында су ташыганга күрә ике бистәне су баскан

Чаллы шәһәре янында урнашкан ике бакчачылык бистәсен су баскан. Гадәттән тыш хәл Кама елгасында су ташу аркасында килеп чыккан. Бу турыда «Татар-информ» агентлыгының үз хәбәрчесе сөйләде.

Аның сүзләренчә, Кама елгасыннан күлгә таба бара торган торбада клапан ватылган. Шуннан соң елгада су ташый башлаган.

«Тукай районында урнашкан „Бережок“ һәм „Энергетик“ бакчачылык ширкәтләрендә урнашкан бистәләр су астында калды», — дип аңлата агентлык хәбәрчесе.

Хәзерге вакытта урында водолазлар эшли. Алар ватык клапанны табарга һәм төзәтергә тиеш була.

Бакчачылар авыр хәлдә калды. Кама елгасы белән Аккош күле арасындагы буа ватылды, дип яза «Челнинские известия» сайты.

Биредә яшәүчеләр мондый бәланең инде беренче тапкыр гына булмавын сөйләгән. «Бережок» ширкәте рәисе Яна Фәхразыева сүзләренчә, әлеге гидрокорылма 1979 елда ук төзелгән. Ул шәһәр балансында тора. Дамбаны төзәткән булганнар инде. Ләкин клапаннар барыбер суны тотып тора алмый икән. 

«Энергетик» ширкәтендә иллеләп участок су астында калган. Үсентеләр һәлак булган. «Бережок» бакчачылары да борчыла. Әгәр су тагын да артса, насос станциясе ватылырга мөмкин. Ул чакта бакчаларга сибү өчен су булмаячак, дип сөйләгән рәис.