Җиденче чакырылыш Татарстан Дәүләт Советы депутатларын сайлауда тавыш бирү алдыннан Үзәк сайлау комиссиясе гражданнарга Татарстан парламентына сайлаулар турында өстәмә мәгълүмат бирү өчен яңартылган проект эшләтеп җибәрде.
«ИнформУИК» проекты республиканың эре шәһәрләрен – Казан, Чаллы, Түбән Кама, Әлмәт һәм Яшел Үзәнне колачлый. Проект Татарстан территориясендә төрле дәрәҗәдә уза торган сайлаулар алдыннан гражданнарга мәгълүмат бирү буенча колачлы эшнең бер өлеше булып торачак.
«ИнформУИК» проекты кысаларында гражданнар күп җыелган урыннарда – эре предприятиеләр янында, мәйданнарда, сәүдә үзәкләре янында, паркларда, скверларда, яр буйларында территориаль һәм участок сайлау комиссияләре әгъзалары, шулай ук махсус җәлеп ителгән волонтерлар сайлаулар турында мәгълүмати материаллар таратачак, тавыш бирү формалары һәм сроклары турында сөйләячәк, беренчел мәгълүматны бирәчәк, татарстанлыларны сайлауларга чакырачак», – дип хәбәр итте ТР Үзәк сайлау комиссиясе рәисе Андрей Кондратьев.
«ИнформУИК» проектында катнашучыларының ак өс киеме, футболка һәм бейсболкасында Дәүләт Советына сайлауларда тавыш бирү логотибы төшерелгән. Җәмәгать урыннарындагы мәгълүмат нокталары да сайлау символикасы белән бизәлгән. «ИнформУИК» проекты 15-30 августта гамәлгә ашырыла. Җиденче чакырылыш Татарстан Дәүләт Советы депутатларын сайлау 8 сентябрьдә узачак. Тавыш бирү участоклары 7:00-20:00 сәгатьтә ачык булачак.