Татарстанда физика, математика һәм информатика укытучыларына яңа ярдәм системасы кертелде

Татарстанда укучыларга белем бирүдә югары нәтиҗәләргә ирешкән физика, математика һәм информатика укытучыларын бүләкләячәкләр. Республика Министрлар кабинетының карарын Татарстан Премьер-министры Алексей Песошин имзалады. Бу турыда Татарстан Мәгариф һәм фән министрлыгы матбугат хезмәте яза.

Премияләр белем бирү эшчәнлегендәге уңышлар һәм физика-математика профиле буенча укучыларны әзерләүнең югары сыйфаты өчен бер тапкыр түләнәчәк.

Укытучылар өчен өч номинация каралган.

«Физика-математика профиле укытучысы» категориясендә ел саен һәркайсы 344 828 сумлык 130 премия бирү планлаштырыла.

«Физика-математика профилендәге яшь укытучы» номинациясендә 275 862 сумлык 100 түләү каралган.

Физика-математика түгәрәкләренә җитәкчелек итүче укытучылар 103 448 сумлык тагын 200 премия ала алачак.

Җиңүчеләр җыелган балл саны буенча билгеләнә. Конкурс нәтиҗәләре буенча катнашучыларның рейтингы төзеләчәк, диелә хәбәрдә.