Татарстанда «Финико» пирамидасында «янган» ир белән хатын наркотиклар сатып тотылган

Татарстанда яшәүе гаилә парын Әлмәттә наркотиклар тарату белән шөгыльләнгән өчен хөкем иткәннәр. Ир белән хатын, «Финико» финанс пирамидасына акча салып төп башына утырганнан соң, җинаять юлына баса. Финанс пирамидасына алар 700 мең сум акча салган һәм янган. Бу хакта KazanFirst сайты яза.

Шулай да, ир белән хатынның җиңел генә акча эшләү нияте барып чыкмый – пирамидага нигез салучыны хөкем итәләр. Йөзәр меңлек кредитны түләү өчен, ир белән хатын наркотиклар тарату белән шөгыльләнә башлый.

Әлмәт районының бер авылында гаилә башлыгы зур күләмдә наркотик ала. Декреттагы хатыны белән бергәләп, 250 грамм наркотикны әз-әзләп бүлеп чыга.

Аларны тоталар. Хокук сакчылары аларның фатирында клиентларга таратылырга тиешле әзерләп куйган 29 пакет наркотик таба.

Ир белән хатын сүзләренчә, нигездә, алар Беренче бистәдә һәм Иске Әлмәттә эшләгән.

Яшь парны 24 эпизодта гаепләгәннәр. Гаилә башлыгын 12 елга кырыс режимдагы колониягә, ә хатынын 7,5 елга гомуми режимдагы колониягә хөкем иткәннәр, дип хәбәр итә Әлмәт шәһәре суды матбугат хезмәте.