Татарстанда фаҗига: гипс руднигында шартлау нәтиҗәсендә ике кеше үлгән
Бүген, 25 нче декабрь иртәнге сәгать 5 тә, Кама Тамагы районында фаҗига була. Гипс руднигында аммонал шартлавы нәтиҗәсендә ике кешенең гомере өзелгән.
Сөкәй авылында “Фоника-Гипс” җаваплылыгы чикләнгән җәмгыяте территориясендә эшчеләр “Крот” тибындагы автомобильдә шартлаткыч кую белән шөгыльләнгән. Шахтага керү урыныннан биш метр ераклыкта җир өстендә көчле шартлау яңгыраган. Нәтиҗәдә, ике кеше һәлак булган.
Хәзер Кама Тамагы районы прокуратурасы, республика прокуроры Илдус Нәфыйков йөкләмәсе буенча, шартлау буенча тикшерү үткәрә. Бу хакта Татарстан прокурорының өлкән ярдәмчесе Руслан Галиев хәбәр итә.
Прокурор тикшерүе нәтиҗәләре буенча, тиешле чаралар күреләчәк. Тикшерү органнары РФ Җинаять кодексының 216 нчы маддәсенең 3 нче часте (“Тау, төзелеш һәм башка эшләр башкарган вакытта куркынычсызлык кагыйдәләрен бозу”) маддәсе буенча җинаять эше кузгаткан.
