Яр Чаллыда юл буеннан узып баручы кеше тереләй күмеп куелган этне тапкан. Коттеджлар яныннан узып барганда, ул җирнең селкенгәнен күреп алган. Җир астыннан этнең борынын абайлангач, бу ир җирне казый башлаган.

"Татар-информ" хәбәр иткәнчә, табылдык этнең алгы тәпие һәм кабыргалары сынган булган.

Ир этне волонтерларга тапшырган. Алар этне автомобиль йөртүче үтергән дип фаразлый. Этне үлде дип белеп, җиргә күмеп калдырган булуы ихтимал. 

Волонтерлар этне юындырып, ашатып, эчертеп, хәл керткән. Хәзер алар эткә медицина ярдәме күрсәтү җаен эзли. Аңа рентген ясатырга кирәк, киләчәктә операция кирәк булуы ихтимал.