Студентлар өчен дәүләт ярдәме чараларының берсе — социаль стипендия. Татарстанда кемнәр аңа дәгъва итә алу турында «Татар-информ» яза.
Дәүләт социаль стипендиясе бюджет нигезендә көндезге бүлектә укучы студентларга, укуда өлгерешенә карамастан, бирелә. Аны түбәндәге категорияләргә кергән студентлар ала ала:
- ятим балалар һәм ата-анасыз калган затлар;
- уку чорында ике ата-анасын да яисә бердәнбер ата-анасын югалткан студентлар;
- балачактан сәламәтлек мөмкинлекләре чикле булган затлар, шулай ук инвалид балалар һәм I, II төркем инвалидлары;
- хәрби хезмәт узу вакытында яисә анда алынган авырулар нәтиҗәсендә инвалид калган студентлар;
- хәрби хәрәкәтләр ветераннары;
- кимендә өч ел контракт буенча хезмәт иткән һәм түбәндәге сәбәпләр буенча хәрби хезмәттән азат ителгән гражданнар: контракт срогы тәмамлану, сәламәтлеге начарлану, оештыру чаралары, хәрби часть тарафыннан шартлар бозылу яки гаилә хәлләре;
- радиация аварияләре нәтиҗәсендә зыян күрүчеләр, шул исәптән Чернобыль фаҗигасе һәм шуңа охшаш башка вакыйгалар;
- дәүләт социаль ярдәме алучы укучылар.
Югары күләмдәге социаль стипендия түбәндәгеләргә бирелә:
- укудагы күрсәткечләре «яхшы» яки «бик яхшы» булган һәм ташламалы категорияләргә кергән беренче һәм икенче курс студентларына;
- 20 яшькә кадәрге студентларга, әгәр аларның бердәнбер ата-анасы I төркем инвалиды булса.
Социаль стипендияне рәсмиләштерү өчен университетның тиешле бүлегенә (деканатка, профкомга яки социаль эш бүлегенә) мөрәҗәгать итәргә һәм ташлама алу хокукын раслаучы документларны — белешмәләр, таныклыклар, хәрби билет һәм башка кирәкле кәгазьләрне — тапшырырга кирәк.